ஜார்க்கண்ட் மாநிலத்தில் மொத்தம் உள்ள 81 தொகுதிகளுக்கான சட்டசபைக்கு அடுத்த மாதம் நவம்பர் 13 மற்றும் 20-ம் தேதி என இரண்டு  கட்டமாக தேர்தல் நடைபெற உள்ள நிலையில், அங்கு அரசியல் கட்சியினரிடையே தேர்தல் களம் அனல் பறந்து வருகிறது.

இந்த நிலையில், பாஜக 66 தொகுதிகளுக்கான முதல் கட்ட வேட்பாளர் பட்டியலை நேற்று வெளியிட்டுள்ளது. அந்த வகையில், ஜார்க்கண்ட் மாநில பாஜக  தலைவர் பாபுலால் மராண்டி தன்வார் தொகுதியிலும், லோபின் ஹெம்ப்ரோம், போரியோ தொகுதியிலும் போட்டியிடுகின்றனர். இதே போல் முன்னாள் முதல்வர் சம்பாய் சோரன் சரைக்கேலாவிலும், முன்னாள் முதல்வர் சிபு சோரனின் மூத்த மருமகள் சீதா சோரன் ஜம்தரா தொகுதியிலும் போட்டியிடுவதாக தெரிவிக்கப்பட்டுள்ளது.

மேலும், கீதாபாய்முசு, சாய்பசாவில் போட்டியிடுவதாகவும், முன்னாள் முதல்வர் மது கோடா மனைவி கீதா கோடா, ஜகன்நாத்பூர் தொகுதியில் போட்டியிடுகிறார் என்று 66 தொகுதிகளுக்காண முதல் கட்ட வேட்பாளர் பட்டியலையே பாஜக அறிவித்துள்ளது.

இதற்கிடையே, மொத்தம் உள்ள 81 தொகுதிகளில் காங்கிரஸ் மற்றும் ஜார்க்கண்ட் முக்தி மோர்ச்சா கட்சிகள் 70 தொகுதிகளிலும், ஆர்.ஜே.டி, கம்யூனிஸ்ட் கட்சிகள் இதர தொகுதிகளிலும் போட்டியிடும் என்று இந்தியா கூட்டணி கட்சியின் தொகுதி பங்கீடு நிறைவில் தெரிவித்துள்ளது என்பது குறிப்பிடத்தக்கது.