ராமநாதபுரம் மாவட்டம், பசும்பொன்னில் நடைபெறும் முத்துராமலிங்கத்தேவர் குருபூஜையில் முதலமைச்சர் மு.க ஸ்டாலின், எதிர்க்கட்சி தலைவர் எடப்பாடி பழனிச்சாமி என பல்வேறு அரசியல் கட்சியினர் பங்கேற்று அவருக்கு மரியாதையை செலுத்தி வருகின்றனர்.

இந்த நிலையில் தேவர் ஜெயந்தி விழாவினையொட்டி சென்னை நந்தனத்தில் உள்ள தேவர் திருமகனாரின் திருவுருவச்சிலைக்கு தமிழக பாஜக சார்பில் மரியாதை செலுத்தப்பட்டது.

இந்த நிகழ்வில், தமிழ்நாடு மாநில முன்னாள் பாஜக தலைவர் தமிழிசை செளந்தரராஜன் பங்கேற்று தேவர் திருமகனாரின் திருவுருவச்சிலைக்கு மலர்த்தூவி மரியாதை செலுத்தினார்.

பின்னர் செய்தியாளர்களிடம் பேசிய அவர், ஆன்மீகமும், அரசியலும் கலக்க முடியாது என்று உதயநிதி சொல்கிறார் என்றும், ஆனால் ஆன்மீகம், அரசியலை சரியாக கொண்டு சென்றதால்தான் தேவருக்கு வெற்றி கிடைத்ததாக கூறிய அவர், முதலமைச்சர் மு.க ஸ்டாலின் தீபாவளி வாழ்த்து சொல்ல வேண்டும் என்று கூறினார்.

மேலும், இன்று உதயநிதி அஜித்துக்கு வாழ்த்து சொல்கிறார் என்றும், விஜய்யை கோபப்படுத்த, அஜித்திற்கு உதயநிதி வாழ்த்து சொல்கிறாரா என்று தெரியவில்லை என்றும், ஆனால் உலக அரங்கில், விளையாட்டை முன்னிறுத்துவதற்கு அஜித்திற்கு வாழ்த்து கூறிவிட்டு, மாநகராட்சி விளையாட்டு திடல்களில் ஒரு மணி நேரத்திற்கு ரூ.1,200 கட்ட வேண்டும் என்ற மிக கொடுமையான தீர்மானத்தை மாநகராட்சி நிறைவேற்றி இருப்பதாக எச்சரித்தார்.