இந்தியாவில் நடைபெறும் பிரம்மாண்ட கிரிக்கெட் தொடரான ஐபிஎல் கிரிக்கெட் தொடர் இதுவரை 15 சீசன்கள் முடிவடைந்துள்ளது. இந்த நிலையில் 2023ம் ஆண்டு மார்ச் அல்லது ஏப்ரல் மாதம் 16வது ஐபிஎல் சீசன் தொடங்கவுள்ளதாக கூறப்பட்டது.

இதனையடுத்து ஐபிஎல் 2023 ஆம் ஆண்டுக்கான ஐபிஎல் போட்டிக்கான வீரர்கள் மினி ஏலம் கடந்த டிசம்பர் 25ம் தேதி கொச்சியில் நடைபெற்றது.

இந்த நிலையில் 2023ம் ஆண்டுக்கான 16வது ஐபிஎல் சீசன் போட்டிகள் எப்போது தொடங்கும் என்ற எதிர்பார்ப்பு நிலவி வந்தது. இந்த நிலையில் 16வது ஐபிஎல் சீசன் போட்டிகள் மார்ச் 31ம் தேதி தொடங்கி ஏப்ரல் 28 வரை நடைபெற உள்ளது.

இந்த சீசனில் சென்னை, மும்பை, பெங்களூர் கொல்கத்தா உள்ளிட்ட12 மைதானங்களில் மொத்தம் 74 போட்டிகள் நடைபெற உள்ளது.

மொத்தம் 10 அணிகள் பங்கேற்கும் இந்த சீசனில் 2 பிரிவுகளாக பிரிக்கப்பட்டுள்ளது. 'ஏ' மும்பை, கொல்கத்தா, ராஜஸ்தான், டெல்லி, லக்னோ ஆகிய அணிகளும், 'பி' சென்னை, குஜராத், பெங்களூர், ஹைதராபாத், பஞ்சாப் ஆகிய 5 அணிகளும் இடம்பெற்றுள்ளன. இதில் ஒவ்வொரு அணியும் தங்களுடைய பிரிவில் உள்ள அணிகளுடன் ஒரு முறையும், எதிர் பிரிவில் உள்ள அணிகளுடன் 2 முறையும் மோதுகின்றன.

இதில், மார்ச் 31ம் தேதி அகமதாபாத்தில் நடைபெறும் முதல் போட்டியில் ஹார்திக் பாண்டியா தலைமையிலான குஜராத் டைட்டன்ஸ் அணியும், எம் எஸ் தோனி தலைமையிலான சென்னை சூப்பர் கிங்ஸ் அணியும் மோதுகின்றன. ப்ளேஆப் மற்றும் இறுதிப்போட்டிக்கான மைதானங்கள் பின்னர் அறிவிக்கப்படும் என தெரிவிக்கப்பட்டுள்ளது.

மேலும், இந்த சீசனில் வழக்கம் போல லீக் சுற்று 7 போட்டிகள் சொந்த மற்றும் 7 போட்டிகள் எதிரணி மைதானங்களில நடைபெற உள்ளது குறிப்பிடத்தக்கது.