அகதிகள் முகாமில் இஸ்ரேல் படையினர் துப்பாக்கிச்சூடு - 3 பாலஸ்தீனியர்கள் பலி

அகதிகள் முகாமில் இஸ்ரேல் படையினர் நடத்திய துப்பாக்கி சூட்டில் 3 பாலஸ்தீனியர்கள் உயிரிழந்துள்ளனர்.

இஸ்ரேலின் பாலஸ்தீன பகுதியில் மேற்கு கரை மற்றும் காசா முனை பகுதிகளில் ஹமாஸ் மற்றும் ஆயுதமேந்திய பயங்கரவாத குழுக்கள் செயல்பட்டு வருகிறது. இதனால் இஸ்ரேலிய பாதுகாப்பு படையினருக்கும், பாலஸ்தீனிய ஆயுதக்குழுக்களுக்கும் இடையே அவ்வப்போது மோதல் சம்பவங்கள் நடந்து வருகின்றன.

இந்நிலையில் இஸ்ரேலிய பாதுகாப்புப் படையினருக்கு எதிராக சமீபத்தில் தாக்குதல்களை நடத்திய ஹமாஸ் தீவிரவாதிகளை கைது செய்வதற்காக பாலஸ்தீனிய அகதிகள் முகாமில் பாதுகாப்பு படையினர் தேடுதல் வேட்டையில் ஈடுபட்டுக் கொண்டிருந்தனர்.

அப்பொழுது இருதரப்பினருக்கும் இடையே நடந்த துப்பாக்கி சூட்டில் 2 பாலஸ்தீனியர்கள் உயிரிழந்தனர். மேலும் இந்த சம்பவம் நடந்த சில மணி நேரத்திற்குள் இஸ்ரேல் பாதுகாப்பு படையினர் மீது துப்பாக்கி சூடு நடத்த முயன்ற மற்றொரு பாலஸ்தீனிய வாலிபர் இஸ்ரேல் படையினரால் சுட்டுக் கொல்லப்பட்டார்.