மதுரையில் ட்ரோன்கள் பறக்கத் தடை - மாவட்ட ஆட்சியர் அதிரடி அறிவிப்பு =..!!

ராமநாதபுரம் மாவட்டத்தில் கட்டப்பட்டுள்ள புதிய பாம்பன் பாலத்தைத் திறப்பதற்காக பிரதமர் மோடி தமிழகம் வருகிறார். பிரதமரின் வருகையை முன்னிட்டு மதுரையில் ட்ரோன் கேமரா பறக்கத் தடை விதிக்கப்பட்டுள்ளது.

இதுகுறித்து மதுரை மாவட்ட ஆட்சியர் சங்கீதா வெளியிட்டுள்ள செய்திக்குறிப்பில் தெரிவித்து இருப்பதாவது:- "ராமநாதபுரம் மாவட்டம் பாம்பன் பாலம் திறப்பு விழாவுக்கு பிரதமர் மோடி வருகிற 6-ந்தேதி வருகிறார். அன்றைய தினம் அவர் மதுரைக்கு வான்வழியாக வருகை தருகிறார்.

மதுரை விமான நிலையத்தில் இருந்து டெல்லிக்கு புறப்பட்டு செல்கிறார். பிரதமர் வருகையையொட்டி மதுரை விமான நிலையம், அதனை சுற்றியுள்ள பகுதிகள் உள்பட மதுரை மாவட்ட பகுதிகளில் 6-ந்தேதி டிரோன்கள், ஆளில்லா விமானங்கள் பறக்க தடை விதிக்கப்படுகிறது.

இந்த தடை உத்தரவை மீறி டிரோன்கள் மற்றும் இதர ஆளில்லா விமானங்கள் பறக்க விடுபவர்கள் மீது சட்டப்படி நடவடிக்கை எடுக்கப்படும்" என்றுத் தெரிவித்தார்.