சென்னை, மின் பகிர்மானக் கழகத் திட்டப் பிரிவு தலைமை பொறியாளர், அனைத்து தலைமை பொறியாளர்களுக்கும் சுற்றறிக்கை ஒன்றினை அனுப்பினார். அதில் விவசாயம் மின் இணைப்பு பணிகளை மார்ச் 15ஆம் தேதிக்குள் முடிக்க வேண்டும் என்று உத்தரவிடப்பட்டுள்ளது.

சுற்றறிக்கை:

மேலும் அந்த அறிக்கையில் கூறப்பட்டிருந்ததாவது, " 2024 - 2025 ஆம் ஆண்டுக்குள் 15,000 விவசாய மின் இணைப்புகளை வழங்க இலக்கு நிர்ணயிக்கப்பட்டது. ஆனால் 11,551 இணைப்புகள் மட்டுமே வழங்கப்பட்டுள்ளன. இதில் சாதாரண பிரிவில் 58% இணைப்புகள் மட்டுமே கொடுக்கப்பட்டுள்ளன. மேலும் திண்டுக்கல், மதுரை, கள்ளக்குறிச்சி, விழுப்புரம்,தேனி, காஞ்சிபுரம், தர்மபுரி, பல்லடம், கிருஷ்ணகிரி, செங்கல்பட்டு, நாமக்கல்,மேட்டூர், நாகப்பட்டினம், தெற்கு கோவை வட்டங்களில் மிகவும் மோசமான நிலையிலேயே இலக்கு எட்டப்பட்டுள்ளது. இது வெறும் 60% க்கும் குறைவு.

பயனாளிகளுக்கு முன்னுரிமை:

தட்கல் பிரிவில் 77% இணைப்புகள் மட்டுமே கொடுக்கப்பட்டுள்ளன. கோவை,மெட்ரோ, கோபி,காஞ்சிபுரம், நாமக்கல், திண்டுக்கல் வட்டங்களில் செயல்பாடு மோசமாக உள்ளன. இவற்றை முற்றிலுமாக வேகப்படுத்த வேண்டும். அரசு திட்டங்களுக்கு கீழ் வரும் பயனாளிகளுக்கு முன்னுரிமை அளிக்கப்பட வேண்டும். இப்பணிகளை மார்ச் 15 க்குள் முடிக்க வேண்டும். " என அதில் தெரிவிக்கப்பட்டுள்ளது. இந்த அறிக்கையானது விவசாயம் மின் இணைப்பு மற்றும் மின்சார வாரிய அலுவலகங்களில் சற்று அதிர்ச்சியை ஏற்படுத்தியுள்ளது. மேலும்,பணியில் இருப்பவர்களுக்கு இது ஒரு சவாலாகவே இருக்கிறது என்று பலரும் தெரிவிக்கின்றனர்.