1 மணி நேர போராட்டத்திற்குப் பிறகு தீயை அணைத்த தீயணைப்புத்துறை...! திருப்பூரில் நடந்த சோகம்...

திருப்பூர் மாநகர் நெசவாளர் காலனியில் வசித்து வருபவர் அண்ணாதுரை என்பவர். இவர் பனியன் வேஸ்ட் குடோன் ஒன்றை, கஞ்சம்பாளையம் பிரிவு பகுதியில் நடத்தி வருகிறார்.

இந்த குடோன்னில் 10க்கும் மேற்பட்ட தொழிலாளர்கள் பணிபுரிந்து வருகின்றனர். இதில் நேற்று வழக்கம்போல் பணி முடிந்து குடோனை பூட்டி விட்டு ஊழியர்கள் மற்றும் அண்ணாதுரை வீட்டிற்கு சென்றுள்ளனர்.

இதைத்தொடர்ந்து, அதிகாலையில் குடோனுக்குள் இருந்து திடீரென புகை வெளியேறியுள்ளது. இதைப் பார்த்த குடோன்னின் அக்கம்பக்கத்தினர் உடனடியாக தீயணைப்பு துறையினருக்கு தகவல் அளித்துள்ளனர்.

இந்தத் தகவலறிந்து சம்பவ இடத்துக்கு வந்த தீயணைப்புத்துறையினர் சுமார் 1 மணி நேரத்திற்கு மேலாக போராடி தீயைகே கட்டுக்குள் கொண்டு வந்தனர்.

இதில் குடோன் முழுவதும் பனியன் கழிவு துணிகள் இருந்ததால், அனைத்து துணிகளும் எரிந்து சாம்பலானது. இதன் மதிப்பு பல லட்ச ரூபாய் இருக்கும் என்று தெரிவிக்கப்படுகிறது.

மேலும் மின் கசிவு காரணமாக இந்த விபத்து ஏற்பட்டதா? அல்லது வேறு ஏதேனும் காரணமா? என அனுப்பர்பாளையம்காவலர்கள் வழக்கு பதிவு செய்து விசாரணை மேற்கொண்டு வருகின்றனர்.இதனால் அப்பகுதியில் சில மணி நேரம் பரபரப்பு ஏற்பட்டது.