தமிழ்நாடு தலைமைச் செயலாளர் இறையன்பு இன்று தனது பணியிலிருந்து ஓய்வு பெற்றார். அவரை பல்வேறு துறை அதிகாரிகளும் வாழ்த்தி வழி அனுப்பி வைத்தனர். இந்த நிலையில் தமிழக முதல்வர் மு.க ஸ்டாலின் ஓய்வு பெற்ற இறையன்புவுக்கு வாழ்த்துக்களையும் நன்றியையும் தெரிவித்துள்ளார். இது தொடர்பாக அவர் எழுதிய கடிதத்தில் "அன்பும் பண்பும் நிறைந்த சகோதரர் திரு வெ.இறையன்பு அவர்களுக்கு எனது மனமார்ந்த வாழ்த்துக்களையும் பாராட்டுகளையும் தெரிவித்துக் கொள்கிறேன்.

பணி ஓய்வு பெற்று செல்லும் இன்றைய தினம் என்பது தங்களது நிர்வாக பணிகளுக்கு ஓய்வே தவிர சமூக, இலக்கிய பணிகளுக்கான ஓய்வல்ல என்பதை தாங்களும் அறிவீர்கள். அந்த வகையில் எதிர்வரும் காலத்திலும் தங்களது சமூக, இலக்கிய ஆய்வுப் பணிகளை தொய்வின்றி தொடர வேண்டும் என்று கேட்டுக்கொள்கிறேன்.

மிக நெருக்கடியான கோவிட் பெருந்தோற்று காலகட்டத்தில் கழக ஆட்சி அமைந்த போது நிர்வாக துறையில் தலைமை பொறுப்பான தலைமைச் செயலாளர் பொறுப்பை தாங்கள் மனமுவந்து ஏற்றுக்கொண்டு வேகமாகவும் விவேகமாகவும் செயல்பட்டீர்கள். கடந்த இரண்டு ஆண்டு கால அரசின் அனைத்து முன்னெடுப்புகளையும் முடுக்கி விட்டு தமிழ்நாட்டை முன்னோடி மாநிலமாக ஆக்குவதற்கு தங்களது சிந்தனை செயல் ஆகிய இரண்டையும் பயன்படுத்தினீர்கள். குறிப்பாக சென்னை வெள்ள நிவாரண பணியின் போதும், உலக சதுரங்க ஒலிம்பியாட் போட்டியினை அனைத்து தரப்பினரும் பாராட்டும் வண்ணம் நடத்தி முடித்திடவும் தங்களின் பங்களிப்பு மகத்தானது. 

மேலும் விடுமுறை தினங்களிலும் தாங்கள் கள ஆய்வுகளை மேற்கொண்டு அலுவலர்களை வழிநடத்திய விதம் போற்றுதற்குரியது. இன்றைக்கு இந்தியாவே தலை நிமிர்ந்து பார்க்கும் மாநிலமாக தமிழ்நாடு விளங்க தங்களது வழிகாட்டுதலும் நிர்வாக திறமையும் துறை ஒருங்கிணைப்பும் மிக மிக முக்கியமான அடித்தளமாக அமைந்திருந்தது.

தங்களது இரண்டு ஆண்டு பணி என்பது தமிழ்நாட்டுக்கு காலகாலமாக நினைவு கூறக்கூடிய பணியாக அமைந்திருந்தது. இதற்கு தமிழ்நாடு அரசும் குறிப்பாக தனிப்பட்ட முறையில் நானும் நன்றி தெரிவித்துக் கொள்கிறோம். இனிவரும் எதிர்கால இளைய தலைமுறை அலுவலர்களுக்கு நீங்கள் ஒரு முன்மாதிரியாக திகழ்ந்து வந்துள்ளீர்கள். பல்துறை ஆற்றல் கொண்ட தாங்கள் தொடர்ந்து இந்த மாநிலத்துக்கும் மனித குல மேம்பாட்டுக்கும் அருட்தொண்டாற்றிட வேண்டும் என கேட்டுக்கொள்கிறேன். அன்புமிகு நன்றிகளை மீண்டும் தெரிவித்துக் கொள்கிறேன்" என அந்த கடிதத்தில் தெரிவித்துள்ளார்.