சென்னை || பாமக நிர்வாகி வீட்டில் பெட்ரோல் குண்டு வீசிய 6 பேர் கைது

சென்னையில் பழைய வண்ணாரப்பேட்டையில் பாமக நிர்வாகி வீட்டில் பெட்ரோல் குண்டு வீசப்பட்ட சம்பவம் பெரும் பரபரப்பை ஏற்படுத்தியுள்ள நிலையில் இந்த சம்பவத்தில் ஆறு பேர் கைது செய்யப்பட்டுள்ளனர்.

சென்னையில் உள்ள பழைய வண்ணாரப்பேட்டை பகுதியைச் சேர்ந்த பாமக மாவட்டச் செயலாளர் வண்ணை சத்யாவின் மகன் நிஷால் இருசக்கர வாகனத்தில் சென்று கொண்டிருந்த போது மூன்று வாகனத்தில் ஐந்து பேர் கொண்ட கும்பல் அவரை கொலை செய்ய முயன்றுள்ளனர்.

இந்த சம்பவம் தொடர்பாக நிஷாலின் தந்தை வண்ணை சத்யா தண்டையார் பேட்டை காவல் நிலையத்தில் புகார் அளித்தார். அந்த நேரத்தில் சத்யாவின் வீட்டில் பெட்ரோல் குண்டு வீசப்பட்டுள்ளது.

இது தொடர்பாக தண்டையார்பேட்டை போலீசார் வழக்கு பதிவு செய்து விசாரணை செய்து வந்த நிலையில், ஷரீஷ், ஆகாஷ், ஆனந்த்,,சாய்காந்த, அருண், கணேஷ் உள்ளிட்ட ஆறுபேரை கைது செய்தனர். 

பின்னர் அவர்களிடம் நடத்திய விசாரணையில், "கடந்த ஆண்டு விநாயகர் சதுர்த்தி ஊர்வலத்தின் போது பாமக பிரமுகர் மகன் நிஷாலுக்கும் கைது செய்யப்பட்டவர்களுக்கும் பிரச்சனை ஏற்பட்டதால் தற்போது கொலைசெய்ய முயன்றது தெரியவந்தது. 

இதையடுத்து போலீசார் கைது செய்யப்பட்ட 6 பேரையும் நீதிமன்றத்தில் ஆஜர்படுத்தி பின்னர் சிறையில் அடைத்தனர். இந்தச் சம்பவம் அப்பகுதியில் பெரும் பரபரப்பை ஏற்படுத்தியுள்ளது.