தமிழகத்தில் விடுமுறை நாட்களில் சிறப்பு பேருந்துகள் இயக்கப்படுவது வழக்கம். அந்த வகையில், இன்று முதல் 5-ம் தேதி வரை வார விடுமுறை நாட்களை முன்னிட்டு தமிழ்நாடு அரசு போக்குவரத்துக் கழகங்கள் தினசரி இயக்கப்படும் பேருந்துகளுடன் கூடுதலாக சிறப்பு பேருந்துகளை இயக்க திட்டமிடப்பட்டுள்ளது.

அதன் படி, சென்னை கிளாம்பாக்கத்திலிருந்து திருவண்ணாமலை, திருச்சி, கும்பகோணம், மதுரை, திருநெல்வேலி, நாகர்கோவில், கன்னியாகுமரி, தூத்துக்குடி, கோயம்புத்தூர், சேலம், ஈரோடு, திருப்பூர் உள்ளிட்ட இடங்களுக்கு இன்று 245 பேருந்துகளும், நாளை 240 பேருந்துகளும் இயக்க திட்டமிடப்பட்டுள்ளது. 

சென்னை கோயம்பேட்டிலிருந்து திருவண்ணாமலை, நாகை, வேளாங்கண்ணி, ஓசூர், பெங்களூரு உள்ளிட்ட இடங்களுக்கு இன்று மற்றும் நாளை மொத்தம் 51 பேருந்துகளும், இயக்க திட்டமிடப்பட்டுள்ளது. மேலும் மாதாவரத்திலிருந்து இன்று மற்றும் நாளை மொத்தம் 20 சிறப்பு பேருந்துகள் இயக்கப்படுகிறது.

இதேபோல், ஞாயிறு அன்று சொந்த ஊர்களில் இருந்து பயணிகள் சென்னை மற்றும் பெங்களூர் திரும்ப வசதியாக தேவைகேற்ப அனைத்து இடங்களிலிருந்தும் சிறப்பு பேருந்துகள் இயக்க திட்டமிடப்பட்டுள்ளது. 

இந்த வார இறுதியில் வெள்ளிக்கிழமை அன்று 6,892 பயணிகளும் சனிக்கிழமை 6,389 பயணிகளும் மற்றும் ஞாயிறு அன்று 10,966 பயணிகளும் பயணம் மேற்கொள்ள முன்பதிவு செய்துள்ளனர். 

மேலும், இந்த எண்ணிக்கை அதிகரிக்க வாய்ப்பு உள்ளதால் தொலைதூர பயணம் மேற்கொள்ள இருக்கும் பயணிகள் கூட்ட நெரிசலை தவிர்க்கும் பொருட்டு, தங்களது பயணத்திற்கு www.tnstc.in மற்றும் Mobile App மூலம் முன்பதிவு செய்து பயணம் செய்யலாம் என்றுத் தெரிவிக்கப்பட்டுள்ளது.