மாநாட்டிற்கு நிலம் கொடுத்தவர்களுக்கு விருந்து - த.வெ.க தலைவர் அறிவிப்பு.!

தமிழ் சினிமாவின் முன்னணி நடிகர் விஜய் தமிழக வெற்றிக் கழகம் என்ற அரசியல் கட்சியை தொடங்கியிருக்கிறார். இந்த கட்சியின் முதல் மாநாடு கடந்த மாதம் 27-ந்தேதி விழுப்புரம் மாவட்டம் விக்கிரவாண்டியில் வெற்றி கொள்கை திருவிழா என்ற பெயரில் நடைபெற்றது.

லட்சக்கணக்கான தொண்டர்கள் பங்கேற்ற இந்த மாநாட்டில் விஜய்யின் பரபரப்பான பேச்சு தமிழக அரசியல் வட்டாரத்தில் பெரும் அதிர்வலையை ஏற்படுத்தியது. இந்த மாநாட்டை தொடர்ந்து தமிழக வெற்றிக்கழகம் வருகிற 2026-ம் ஆண்டு சட்டமன்ற தேர்தலை எதிர்கொள்ள தயாராகி வருகிறது. அதற்கேற்ப அரசியல் வியூகங்களை விஜய் அமைத்து வருகிறார்.

இந்த நிலையில், த.வெ.க. தலைவர் விஜய் விக்கிரவாண்டியில் மாநாட்டிற்கு நிலம் கொடுத்தவர்களை அழைத்து விருந்து அளித்து விஜய் கவுரவிக்க உள்ளார். சென்னை பனையூரில் உள்ள கட்சி அலுவலகத்தில் நாளை காலை 10 மணிக்கு இந்த நிகழ்வு நடைபெற உள்ளது" என்று தகவல் வெளியாகியுள்ளது.