தமிழக வெற்றிக் கழகம் கொடியில் யானை சின்னம் இடம்பெற்றது தொடர்பாக தேர்தல் ஆணையத்தில், பகுஜன் சமாஜ் கட்சி புகார் மனு அளித்துள்ளது.

கடந்த 22 ஆம் தேதி தமிழக வெற்றிக் கழகத்தின் கொடியை அறிமுகம் செய்து வைத்த அக்கட்சியின் தலைவர் விஜய், பின்னர் 45 அடி உயர கொடி கம்பத்தில் கட்சியின் கொடியை ஏற்றி வைத்தார்.

நடிகர் விஜயின் கட்சி கொடியில், மேலும் - கீழும் சிவப்பு நிறத்திலும், நடுவில் மஞ்சள் நிறத்திலும் , நடுவில் உள்ள மஞ்சள் நிறத்தில் இரு யானைகளுக்கு இடையில், வாகை மலர் உள்ளது. வாகை மலர் சுற்றிலும் 28 நட்சத்திரங்கள் உள்ளன. இதில் பச்சை நிறத்தில் 23, நீல நிறத்தில் 5 நட்சத்திரங்கள் ஒளிரும் வகையில் உள்ளது. 

தவெக கொடியில் இடம்பெற்றுள்ள நிறம், யானை, பூ குறித்து பல்வேறு எதிர்ப்புகளும், சர்ச்சைகளும் எழுந்துள்ளன.

குறிப்பாக பகுஜன் சமாஜ் கட்சியின் சின்னமான யானை படத்தை பயன்படுத்துவது தேர்தல் விதியின்படி தவறானது என்றும், உடனடியாக யானை படத்தை நீக்க வேண்டும், இல்லையென்றால் தேர்தல் ஆணையத்திடம் புகார் அளிக்கப்படும் என்று, அக்கட்சியின் மாநில தலைவர் எச்சரிக்கை விடுத்தது இருந்தார்.

ஆனால், இதனை சட்ட ரீதியாக எதிர்கொள்ள தமிழக வெற்றிக் கழகம் தயாராகி வருவதாகவும், கொடியில் இனி எந்த மாற்றமும் செய்யப்பட போவதில்லை என்ற முடிவு எடுத்துள்ளதாக தகவல்கள் வெளியாகின. 

இந்நிலையில், சென்னை தலைமை தேர்தல் அலுவலகத்தில் பகுஜன் சமாஜ் கட்சியின் மாநில தலைவர் புகார் மனு ஒன்றை கொடுத்துள்ளார்.

அவரின் அந்த புகார் மனுவில், தேர்தல் ஆணையத்தால் அங்கீகரிக்கப்பட்ட தேசிய கட்சியின் ஒரு சின்னத்தை, நடிகர் விஜய் அவரது கட்சி கொடியில் பயன்படுத்தி உள்ளதாகவும், எனவே தமிழக வெற்றிக் கழகத்தின் கொடியில் உள்ள யானை சின்னத்தை அகற்றி, குழப்பம் ஏற்படாமல் இருக்க நடவடிக்கை எடுக்க வேண்டும் என்றும் புகார் மனுவில் கோரிக்கை வைக்கப்பட்டுள்ளது.