சேலத்தில் காடையாம்பட்டி மற்றும் மேட்டூர் உள்ளிட்ட சில இடங்களில் அவ்வப்போது சிறுத்தைகள் நடமாட்டம் உள்ளதாக அப்பகுதி மக்கள் கூறி வந்தனர். இதையடுத்து வனத்துறை அதிகாரிகள் அப்பகுதிகளில் கேமரா பொருத்தி கண்காணித்தனர். மேலும் மலையில் மேய்ச்சலுக்கு சென்ற ஆடு, மாடுகள் மர்மமாக இறந்து கிடந்தன. ஆனால் கேமராவில் சிறுத்தை நடமாட்டத்திற்கான எந்த தடயமும் கிடைக்கவில்லை.

இந்நிலையில் கடந்த மாதமும் ராமசாமிமலை, குண்டுக்கல் உள்ளிட்ட பகுதிகளில் நாய் மற்றும் ஆடுகளை சிறுத்தை கடித்துள்ளது. மேலும் கடந்த வாரம் சர்க்கரைசெட்டிப்பட்டி கிராமத்தில் பட்டிக்குள் இருந்த 6 ஆடுகளை கடித்துள்ளது. மேலும் காருவள்ளி ஊராட்சியில் கோம்பை கரடில் வனப்பகுதியில் ஒரு மாட்டை அடித்து சாப்பிட்டுள்ளது.

இதையடுத்து அப்பகுதி மக்கள் வனத்துறையிடம் புகாரளித்ததையடுத்து, அந்த பகுதியில் ஆய்வு செய்து சிறுத்தை வந்து சென்ற கால் தடம் கண்டுபிடிக்கப்பட்டது. அந்த கால் தடங்களை கெமிக்கல் தண்ணீரில் கலந்து ஆய்வு மேற்கொண்டனர். மேலும் அப்பகுதி மக்கள் சிறுத்தை உருவத்தில் ஒரு விலங்கை பார்த்ததாக கூறியுள்ளனர்.

இந்நிலையில் மேட்டூரிலும் நங்கவள்ளி அருகே உள்ள வனப்பகுதியில் தனது காணாமல் போன ஆட்டின் தலைப்பகுதியை பார்த்ததாக விவசாயி ஒருவர் மேட்டூர் வனத்துறைக்கு தகவல் அளித்துள்ளார். இதையடுத்து சிறுத்தையை தீவிரமாக தேடும் வனத்துறையினர், காடையாம்பட்டியில் நடமாடிய சிறுத்தை தான் மேட்டூர் வந்துள்ளதா அல்லது இது வேறு சிறுத்தையா என்று குழப்பமடைந்துள்ளதாக தெரிகிறது. 

இதனால் மேட்டூர், காடையாம்பட்டி மற்றும் சுற்று வட்டார பகுதி மக்கள் அனைவரும் அச்சத்தில் உள்ளனர்.