யூடியூபில் ட்ரெண்டிங் செய்யும் கோட் டிரைலர்......2 கோடி பார்வையாளர்களை கடந்து அசத்தல்!

நடிகர் விஜய் நடிப்பில், இயக்குனர் வெங்கட் பிரபு இயக்கத்தில் உருவாகியுள்ள கோட் திரைப்படம், அடுத்த மாதம் 5ம் தேதி திரையரங்குகளில் வெளியாகிறது. இந்தப் படத்தில் நடிகர்கள் பிரசாந்த், பிரபுதேவா, ஜெயராம், யோகிபாபு மற்றும் நடிகைகள் சினேகா, லைலா, மீனாட்சி சவுத்ரி உள்ளிட்ட பலர் நடித்துள்ளனர்.

மேலும் இந்த படத்தை ஏஜிஎஸ் நிறுவனம் தயாரித்துள்ளது. இப்படத்தின் முதல் பாடலான 'விசில் போடு' என்ற பாடல் வெளியாகி ரசிகர்களிடையே கலவையான விமர்சனங்களைப் பெற்றது. இரண்டாவது பாடலான 'சின்ன சின்ன கண்கள்' விஜய்யின் பிறந்த நாளை முன்னிட்டு வெளியானது.

இப்படத்தின் 3வது பாடலான `ஸ்பார்க்' வெளியாகி வைரலானது. இந்நிலையில் 'கோட்' படத்தின் டிரெய்லர் நேற்று மாலை 5 மணிக்கு வெளியிடப்பட்டது. இதில் தந்தை, மகன் என 2 கதாபாத்திரங்களில் விஜய் நடித்துள்ள காட்சிகள் இடம்பெற்றுள்ளன.

துப்பாக்கி சண்டை, கார் சேசிங், மோட்டார் சைக்கிளில் பறப்பது போன்ற சாகச காட்சிகளும் இடம்பெற்றுள்ளன. மேலும், விஜயை ஹாலிவுட் தொழில்நுட்பத்தை பயன்படுத்தி மிகவும் இளமையானவராக வெங்கட்பிரபு காட்டியுள்ளார். இந்த நிலையில் 'தி கோட்' படத்தின் டிரைலர் தற்போது யூடியூபில் 2 கோடி பார்வைகளை கடந்துள்ளது.