தென்னிந்திய சினிமாவில் முன்னணி நடிகராக இருந்து வரும் நடிகர் விஜய் தற்போது லோகேஷ் கனகராஜ் இயக்கும் லியோ படத்தில் ஹீரோவாக நடித்து வருகிறார். இந்த படத்திற்கு ராக்ஸ்டார் அனிருத் இசையமைக்கிறார். சமீபத்தில் லியோ படத்தின் முதற்கட்ட படப்பிடிப்பு காஷ்மீரில் முடிவடைந்த நிலையில், அடுத்த கட்ட படிப்பிடிப்பு சென்னையில் நடைபெற்று வருகிறது. மேலும் இந்த திரைப்படம் வரும் தீபாவளிக்கு வெளியாகும் என படக்குழு அறிவித்துள்ளது.

இதனிடையே நடிகர் விஜய்யின் பிறந்தநாளான நாளை (ஜூன் 22 ஆம் தேதி) லியோ படத்தில் முதல் பாடல் வெளியாகும் என படக்குழு அதிகாரப்பூர்வமாக அறிவித்திருந்தது. மேலும், தளபதி விஜயின் பிறந்த நாளை முன்னிட்டு இன்று  நள்ளிரவு 12 மணிக்கு 'லியோ' படத்தின் ஃபர்ஸ்ட் லுக் போஸ்டர் வெளியாகும் என படக்குழு அதிகாரப்பூர்வமாக அறிவித்துள்ளது குறிப்பிடத்தக்கது.

இந்த நிலையில் நாளை நடிகர் விஜய்யின் பிறந்த நாளை முன்னிட்டு பல திரையரங்குகளில் அவர் நடித்த திருமலை, திருப்பாச்சி, போக்கிரி, துப்பாக்கி, பிகில், மெர்சல், மாஸ்டர் உள்ளிட்ட திரைப்படங்கள் சிறப்பு காட்சிகளாக திரையிடப்பட உள்ளன. 

அந்த வகையில் சென்னையில் உள்ள பிரபல திரையரங்களான கமலா மற்றும் ரோகினி திரையரங்குகளில் அனைத்து காட்சிகளும் நடிகர் விஜய்யின் திரைப்படங்களை திரையிட திட்டமிடப்பட்டுள்ளது. தற்போது இந்த தகவல் விஜய் ரசிகர்களிடையே உற்சாகத்தை ஏற்படுத்தி உள்ளது