உரிய அனுமதி இல்லாமல் கொடி ஏற்ற வேண்டாம் என்று, தனது கட்சி நிர்வாகிகளுக்கு தமிழக வெற்றிக் கழகத்தின் தலைவர் விஜய் எச்சரிக்கை கொடுத்துள்ளார்.

கடந்த பிப்ரவரி மாதம் நடிகர் விஜய் தமிழக வெற்றிக் கழகம் என்ற அரசியல் கட்சியை தொடங்கிய நிலையில், கடந்த இரண்டு தினங்களுக்கு முன்பு கட்சியின் கொடியை அறிமுகம் செய்து வைத்து கொடியை ஏற்றி வைத்தார்.

இதனைத் தொடர்ந்து தமிழகம் முழுவதும் தமிழக வெற்றிக் கழகத்தின் நிர்வாகிகள் கட்சியின் கொடியை ஏற்றி பொது மக்களுக்கு இனிப்புகளையும் பல்வேறு நலத்திட்டங்களையும் செய்து வைத்த வருகின்றனர். 

இந்த நிலையில், மதுரையில் நடிகர் விஜயின் தமிழக வெற்றிக் கழகத்தின் 50 அடி உயர கொடி கம்பம் நடுவதற்கு அனுமதி ரத்து செய்யப்படுவதாக காவல்துறை தரப்பில் தெரிவிக்கப்பட்டுள்ளது. 

மதுரை கோரிப்பாளையம் பகுதியில் 50 அடி உயர கொடி கம்பம் நடுவதற்கு தல்லாகுளம் போலீசார் தற்போது அனுமதி மறுப்பு தெரிவித்துள்ளனர்.

மதுரை மாநகராட்சியின் தடையில்லா சான்றிதழை இணைக்காததால் தற்போது அனுமதி ரத்து செய்யப்பட்டுள்ளதாக காவல்துறை தரப்பில் விளக்கம் அளிக்கப்பட்டுள்ளது.

இந்நிலையில் தமிழக வெற்றி கழகத்தின் தலைவர் விஜய், உரிய அனுமதி பெறாமல் கட்சிக்கொடியை ஏற்ற வேண்டாம் என்று தனது கட்சி நிர்வாகிகளுக்கு அறிவுறுத்தி உள்ளார்.