தமிழ்நாட்டின் தடகள 'தங்கமகன் மாரியப்பன் தங்கவேலு:

பிறப்பு :

இந்திய தடகள விளையாட்டு வீரர் மாரியப்பன் தங்கவேலு 1995ஆம் ஆண்டு ஜூன் 28ஆம் தேதி பிறந்தார். தமிழ்நாட்டு விளையாட்டு வீரரான இவர் உயரம் தாண்டுதல் போட்டிகளில் பங்கேற்று வருகின்றார்.

5 வயதில் ஒரு நாள் காலை பள்ளிக்கு செல்வதற்காக சாலையோரம் சென்று கொண்டிருந்த மாரியப்பன் மீது அந்த வழியாக வந்த லாரி மோத முழங்காலுக்கு கீழே உள்ள கால் பகுதியை இழந்தார்.

கால் இல்லை என்பதற்காக மாரியப்பன் முடங்கிவிட வில்லை. உயரம் தாண்டுதலில் முழு மூச்சில் ஈடுபட்டார். பள்ளி பருவத்தில் மாரியப்பனின் உயரம் தாண்டுதலில் உள்ள அசாத்தியமான திறமையை அறிந்த உடற்கல்வி ஆசிரியர் ஊக்கம் கொடுத்து பயிற்சி அளித்தார்.

குடும்பம் : 

மாரியப்பன் தமிழ்நாட்டிலுள்ள, சேலம் மாவட்டம், ஓமலூர் அருகேயுள்ள பெரிய வடக்கம்பட்டியைச் சேர்ந்தவர். இவரது பெற்றோர் தங்கவேல்-சரோஜா. செங்கல் சூளை மற்றும் காய்கறி வியாபாரம் செய்து வருகின்றனர். இவருக்கு சுதா என்ற சகோதரியும், குமார் மற்றும் கோபி என்ற இரு சகோதரர்களும் உள்ளனர்.

சாதனைகள் :

மாவட்ட மற்றும் மாநில அளவில் நடைபெற்ற போட்டிகளில் வெற்றி பெற்ற மாரியப்பன். கடந்த 2012ஆம் ஆண்டு முதல் 2015ஆம் ஆண்டு வரை சர்வதேச அளவில் நடைபெற்ற போட்டிகளில் பங்கேற்று தங்கம் வென்று சாதனை படைத்தார்.

பிரேசிலின் ரியோ டி ஜெனீரோவில் 2016ஆம் ஆண்டு செப்டம்பர் மாதம் நடந்த பாரா ஒலிம்பிக்கில் தமிழகத்தை சேர்ந்த மாரியப்பன் தங்கவேலு உயரம் தாண்டுதலில் தங்கப் பதக்கம் வென்று வரலாற்று சாதனை படைத்தார். அவர் 1.89 மீட்டர் உயரம் தாண்டி அசத்தினார்.

2020ஆம் ஆண்டு டோக்கியோ பாரா ஒலிம்பிக் உயரம் தாண்டும் போட்டியில் இவர் வெள்ளிப் பதக்கம் வென்றார்.

நவம்பர் 2019ஆம் ஆண்டு துபாயில் நடைபெற்ற உலக பாரா தடகள சாம்பியன்ஷிப் போட்டியில் இவர் 1.80 மீட்டர் உயரம் தாண்டி வெண்கல பதக்கத்தை வென்றார்.

அஞ்சல் தலை :

மை ஸ்டாம்ப் என்ற திட்டத்தின் கீழ் சேலம் தபால் துறை சார்பில் இவர் உருவம் பொறித்த அஞ்சல் தலை வெளியிடப்பட்டு சிறப்பிக்கப்பட்டது.

விருதுகள் :

2016ஆம் ஆண்டு ஆனந்த விகடன் 'டாப் 10" மனிதர்கள் விருது

பத்மஸ்ரீ விருது

அர்ஜூனா விருது

ராஜீவ் காந்தி கேல் ரத்னா விருது.

சாதனைக்கு ஊனம் ஒரு தடையல்ல என்று நிரூபித்து தடைக்கற்களை படிக்கற்களாக மாற்றி இந்தியாவிற்கு தங்கப்பதக்கம் பெற்றுத்தந்து பெருமை சேர்த்தவர் தங்கமகன் மாரியப்பன். இவரது சாதனை இந்திய இளைய தலைமுறையினருக்கு ஒரு எடுத்துக்காட்டு.