2023 ஆம் ஆண்டு 50 ஓவர் உலகக்கோப்பை போட்டி இந்தியாவில் நடைபெற உள்ளது.  அந்த வகையில் இந்த உலகக்கோப்பை அக்டோபர் மற்றும் நவம்பர் மாதங்களில்  நடைபெற உள்ளது.

அதன்படி அக்டோபர் 5ம் தேதி தொடங்கி நவம்பர் 19ஆம் தேதி வரை நடைபெற உள்ளது. மொத்தம் 45 லீக் போட்டிகளும், 3 நாக்அவுட் போட்டிகள் உட்பட மொத்தம் 48 போட்டிகள் நடைபெற உள்ளது. 

இதில், 2023 உலக கோப்பை தொடருக்கு இந்தியா, நியூசிலாந்து, இங்கிலாந்து, வங்கதேசம், பாகிஸ்தான், ஆஸ்திரேலியா, ஆப்கானிஸ்தான், தென் ஆப்ரிக்கா ஆகிய 8 அணிகள் நேரடியாக தகுதி பெற்றுள்ளது. 

மேலும், மீதமுள்ள 2 அணிகளுக்கான தகுதி சுற்று போட்டிகள் ஜிம்பாப்வேவில் நடைபெற்று வருகிறது. மொத்தம் 10 அணிகள் பங்கேற்கும் இந்த தகுதி சுற்றில் 2 பிரிவுகளாக பிரிக்கப்பட்டுள்ளது. 

இதில் 'ஏ' பிரிவில் நேபாளம், நெதர்லாந்து, அமெரிக்கா, வெஸ்ட் இண்டீஸ், ஜிம்பாப்வே அணிகளும், 'பி' பிரிவில் அயர்லாந்து, ஓமன், ஸ்காட்லாந்து, இலங்கை, ஐக்கிய அரபு அமீரகம் ஆகிய அணிகளும் இடம்பெற்றன. 

இதில், லீக் சுற்று போட்டிகளின் முடிவில் 'ஏ' பிரிவில் இருந்து நெதர்லாந்து, வெஸ்ட் இண்டீஸ், ஜிம்பாவே அணிகளும், 'பி' பிரிவில் இருந்து ஓமன், ஸ்காட்லாந்து, இலங்கை ஆகிய 6 அணிகளும் சூப்பர் சிக்ஸ் சுற்றுக்கு முன்னேறியது.

அதன்படி, சூப்பர் சிக்ஸ் சுற்றில் ஒவ்வொரு அணியும் எதிரணியுடன் ஒரு முறை மோத வேண்டும். இறுதியாக புள்ளி பட்டியலில் முதல் 2 இடங்களை பிடிக்கும் அணிகள் இந்தியாவில் நடைபெற உள்ள உலகக் கோப்பை கிரிக்கெட் தொடருக்கு தேர்வாகும் என்பது குறிப்பிடத்தக்கது.

இந்த நிலையில் இலங்கை அணி  இதுவரை 4 போட்டிகளில் விளையாடி 4 போட்டிகளிலும் வெற்றி பெற்று 8 புள்ளிகளுடன் உலகக் கோப்பை போட்டிக்கு முதல் அணியாக தகுதி பெற்றது.

அதனைத் தொடர்ந்து 2வது அணியாக தகுதி பெறுவதில் நெதர்லாந்து மற்றும் ஸ்காட்லாந்து அணிகளுக்கு இடையே கடும் போட்டி நிலவியது. இந்த நிலையில் இன்று நெதர்லாந்து - ஸ்காட்லாந்து அணிகளுக்கு இடையேயான கடைசி போட்டி நடைபெற்றது.

இந்த போட்டியில் வெற்றி பெறும் அணி உலகக்கோப்பை தொடருக்கு தகுதி பெறும் என்பதால் பெரும் எதிர்பார்ப்பை ஏற்படுத்தியது. அதன்படி, இன்று மதியம் தொடங்கிய இந்த போட்டியில் முதலில் பேட்டிங் செய்த ஸ்காட்லாந்து அணி 50 ஓவர்கள் முடிவில் 9 விக்கெட் இழப்பிற்கு 277 ரன்கள் குவித்தது.

அதனைத் தொடர்ந்து 278 ரன்கள் எடுத்தால் வெற்றி என்ற இலக்குடன் களமிறங்கிய நெதர்லாந்து அணி 42.5 ஓவர்களில் 6 விக்கெட் இழப்பிற்கு 278 ரன்கள் எடுத்து 4 விக்கெட் வித்தியாசத்தில் அபார வெற்றி பெற்றது.

இதன் மூலம் நெதர்லாந்து அணி இந்தியாவில் நடைபெறவுள்ள 50 உலகக் கோப்பை தொடருக்கு தகுதி பெற்றுள்ளது. மேலும், வரும் ஜூலை 9ம் தேதி நடைபெறவுள்ள உலகக் கோப்பை தகுதிச்சுற்று இறுதிப் போட்டியில் இலங்கை - நெதர்லாந்து அணிகள் மோதுகின்றன.