கோவை மாவட்டத்தில் தனியார் கல்லூரி பேருந்து மோதி தந்தை-மகன் உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.

கோவை மாவட்டம் கணபதிபாளையம் பகுதியை சேர்ந்தவர் விவசாயி தங்கவேலு(60). இவருடைய மகன் நந்தகுமார்(34). இந்நிலையில் இன்று காலை மோட்டார் சைக்கிளில் தங்கவேளும், நந்தகுமாரும் கருமத்தம்பட்டி நோக்கி சென்று கொண்டிருந்தனர். அப்பொழுது கிட்டாம்பாளையம் நால்ரோடு பகுதியில் சாலையை கடப்பதற்காக நின்று கொண்டிருந்துள்ளனர். 

அப்பொழுது பொள்ளாச்சி நோக்கி வந்த தனியார் கல்லூரி பேருந்து ஒன்று, திடீரென நின்று கொண்டிருந்த மோட்டார் சைக்கிள் மீது பயங்கரமாக மோதியது. இதில் தூக்கி வீசப்பட்ட தந்தை-மகன் இருவரும் பேருந்து சக்கரத்தில் சிக்கி சம்பவ இடத்திலேயே பரிதாபமாக உயிரிழந்தனர். இதையடுத்து இந்த சம்பவம் குறித்து அவ்வழியாக சென்றவர்கள் கருமத்தம்பட்டி காவல்துறையினருக்கு தகவல் தெரிவித்தனர்.

இந்த தகவலையடுத்து சம்பவ இடத்திற்கு விரைந்து வந்த போலீசார் உயிரிழந்த தந்தை-மகனின் உடலை கைப்பற்றி பிரேத பரிசோதனைக்காக மருத்துவமனைக்கு அனுப்பி வைத்தனர். மேலும் அப்பகுதியில் இருந்த சிசிடிவி கேமராவில் பதிவான நெஞ்சை பதப்பதைக்கும் இந்த விபத்து காட்சி தற்போது சமூக வலைதளங்களில் பரவி வருகிறது. இந்நிலையில், இந்த சம்பவம் குறித்து போலீசார் வழக்கு பதிவு செய்து விசாரணை மேற்கொண்டு வருகின்றனர்.