தேர்வில் குளறுபடி.!! சிதம்பரம் அருகே அரசுக் கல்லூரி மாணவர்கள் சாலை மறியல்.!

கடலூர் மாவட்டம் சிதம்பரம் அருகே சி.முட்லூரில் உள்ள அரசு கலைக்கல்லூரியில் 2 ஆயிரத்துக்கும் மேற்பட்ட மாணவ, மாணவிகள் படித்து வருகின்றனர். இங்கு கடந்த மே மாதம் பருவத் தேர்வு நடைபெற்றது. 

அதற்கான முடிவுகள் கடந்த 10 நாட்களுக்கு முன்பு வெளியான நிலையில் பல மாணவர்களின் தேர்வு முடிவுகள் நிறுத்தி வைக்கப்பட்டுள்ளது.

மேலும் அரியர் எழுதிய பல மாணவர்களின் முடிவுகளும் அறிவிக்கப்படாமலும், பெரும்பாலான மாணவர்களுக்கு மதிப்பெண்கள் மிகவும் குறைவாகவும் வழங்கப்பட்டுள்ளது.

இது குறித்து மாணவர்கள் கல்லூரி நிர்வாகத்தினரிடம் கேட்டபோது, நிர்வாகத்தினர் உரிய பதில் அளிக்கவில்லை. இதனால் ஆத்திரமடைந்த கல்லூரி மாணவ, மாணவிகள் நேற்று வகுப்புகளைப் புறக்கணித்தனர்.

மேலும், தேர்வு முடிவினால், மாணவர்கள் கடுமையாக பாதிக்கப்பட்டுள்ளதாகவும், இதை தவிர்க்க உரிய நடவடிக்கை எடுக்க வேண்டும் என்று கூறி கல்லூரி முன்பு உள்ள சாலையில் மறியலில் ஈடுபட்டனர். 

அப்போது, அவர்கள் தேர்வு முடிவு குளறுபடிக்கு காரணமான திருவள்ளூவர் பல்கலைக்கழகத்தை கண்டித்து கோஷங்களை எழுப்பினர்.

இந்த சம்பவம் குறித்து கிடைத்த தகவலின் பேரில் போலீஸார் விரைந்து வந்து மாணவர்களிடம் பேச்சுவார்த்தை நடத்தினர். அதன் பின்னர் மாணவர்கள் அங்கிருந்து கலைந்துச் சென்றனர்.