பெண் ஊழியர்களிடம் ஆபாச பேச்சு - திருவண்ணாமலை கோவில் அதிகாரி இடைநீக்கம்.!!

தமிழகத்தில் உள்ள சிவன் ஆலயங்களில் முக்கியமானதாக திருவண்ணாமலை அருணாசலேஸ்வரர் கோவில் உள்ளது. இந்தக் கோவிலில் பல்வேறு பணிகளில் 300-க்கும் மேற்பட்ட பணியாளர்கள் ஈடுபட்டு வருகின்றனர். அதில், பொறியியல் துறையில் வரைவாளராக சதீஷ் என்பவர் பணியாற்றி வருகிறார்.

இதேபோல் கோவிலை சுத்தம் செய்யும் பணியில் 16 பெண் பணியாளர்கள் தற்காலிகமாக பணிபுரிந்து வருகின்றனர். இந்த நிலையில், பெண் ஊழியர் ஒருவர் ஆடியோ ஒன்றை சமூக வலைதளங்களில் வெளியிட்டுள்ளார்.

அந்த ஆடியோவில், வரைவாளர் சதீஷ் பெண்களிடம் ஆபாசமாக பேசி மனரீதியாக தொல்லை கொடுக்கிறார். இதனால், மன உளைச்சலுக்கு ஆளாகும் நிலை உள்ளது என்றுத் தெரிவித்துள்ளார். இந்த ஆடியோ வைரலாகி பெரும் பரபரப்பை ஏற்படுத்தியுள்ளது.

இந்த ஆடியோ விவகாரம் தொடர்பாக கோவில் நிர்வாகிகள் விசாரணை நடத்தினர். அதன் பின்னர் அதிகாரி சதீஷ் இடைநீக்கம் செய்யப்பட்டார். இந்த சம்பவம் அப்பகுதியில் பெரும் பரபரப்பை ஏற்படுத்தியது.