திருவண்ணாமலை அருகே இளம்பெண் ஒருவரை கரும்பு தோட்டத்தில் வைத்து பாலியல் பலாத்காரம் செய்ய முயன்ற சம்பவம் பெரும் பரபரப்பையும், அதிர்ச்சியையும் ஏற்படுத்தி உள்ளது.

திருவண்ணாமலை மாவட்டம், வாணாபுரம் பகுதியை சேர்ந்த 30 வயது இளம்பெண் ஒருவர், விவசாய கூலி வேலைக்காக சென்று விட்டு நேற்று மாலை பொழுதில் வீடு திரும்பி கொண்டிருந்தார். அப்போது அங்கு உள்ள கரும்பு தோட்டம் வழியாக அவர் தனியாக வந்துள்ளார்.

இதனை பார்த்த அதே கிராமத்தை சேர்ந்த வாலிபர் ஒருவர், அந்த இளம்பெண்ணை பின்தொடர்ந்து வந்துள்ளார்.  சற்று ஆளரவமற்ற கரும்புத் தோட்டம் பகுதி வந்ததும், அந்த வாலிபர் திடீரென இளம்பெண்ணின் வாயில் துணியை வைத்து, கரும்பு தோட்டத்துக்குள் தரதரவென இழுத்து சென்றார். 

அங்கு வைத்து அந்த இளம் பெண்ணை பாலியல் பலாத்காரம் செய்ய முயலும் போது, அவரது பிடியில் இருந்து தப்பித்த அந்த இளம்பெண், வாயில் இருந்த துணியை எடுத்துவிட்டு, கத்திக் கூச்சலிட்டு உள்ளார்.

இளம் பெண்ணின் அபாய குரல் கேட்டு, அந்த பகுதி பொதுமக்கள் உடனடியாக கரும்பு தோட்டத்துக்குள் ஓடிவந்தனர். வாலிபரின் பிடியில் இருந்த இளம் பெண்ணை மீட்ட பொதுமக்கள், அந்த வாலிபருக்கு தர்ம அடி கொடுத்து, வாணாபுரம் காவல் நிலைய போலீசாரிடம் ஒப்படைத்தனர்.

மேலும் இந்த சம்பவத்தில் பலத்த காயமடைந்த இளம்பெண்ணை மீட்ட பொதுமக்கள், திருவண்ணாமலை அரசு மருத்துவமனையில் சிகிச்சைக்காக சேர்த்துள்ளனர்.

இந்த சம்பவம் குறித்து திருவண்ணாமலை டிஎஸ்பி அண்ணாதுரை, இன்ஸ்பெக்டர் தனலட்சுமி மற்றும் போலீசார் சம்பவ இடத்திற்கு சென்று நேரில் விசாரணை மேற்கொண்டு வருகின்றனர். மேலும் கைது செய்யப்பட்டு அந்த வாலிபரிடம் போலீசார் தீவிர விசாரணை மேற்கொண்டு வருகின்றனர்.