ஊத்துக்கோட்டை அருகே ஆடு திருடிய இரு வாலிபர்கள் கைது செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தி உள்ளது.

ஊத்துக்கோட்டை பெரியபாளையம் அடுத்த தாமரைப்பாக்கம் அருகே கூடுவேலி பகுதியை சேர்ந்தவர் சரண்ராஜ். இவர் 20க்கும் மேற்பட்ட வெள்ளை ஆடுகளை வளர்த்து வருகிறார். சம்பவத்தன்று வழக்கம் போல் தனது ஆடுகளை  மேய்ச்சலுக்காக ஊருக்கு வெளிப்புறம் உள்ள பகுதியில் அழைத்து சென்றுள்ளார்.

அங்கு ஆடுகள் வயல்வெளிக்கு அருகே உள்ள சாலை ஓரத்தில் மேய்ந்துகொண்டிருந்ததாக கூறப்படுகிறது. அப்போது மாலை நேரத்தில் அந்த வழியாக ஆட்டோவில் வந்த இரண்டு நபர்கள் மேய்த்துக் கொண்டிருந்த 15 ஆடுகளில் ஒரு ஆட்டை மட்டும் ஆட்டோவில் எற்றியதாக கூறப்படுகிறது.

இதனைக் கண்டு அதிர்ச்சி அடைந்த உரிமையாளர் சரண்ராஜ்  சத்தம் போட்டவாறு ஓடி வந்துள்ளார். அவரைக் கண்டு திருடர்கள் ஆட்டை ஆட்டோவில் ஏற்றிக்கொண்டு மின்னல் வேகத்தில் தப்பி சென்றுள்ளனர்.

ஊர் வழியாக செல்லும்போது அந்த ஆட்டோவை மடக்கி பிடித்த ஊர் மக்கள் ஆடு திருடிய இரண்டு பேரை தர்ம அடி கொடுத்து போலீசாரிடம் ஒப்படைத்தனர். அவர்களிடம் போலீசார் நடத்திய முதற்கட்ட விசாரணையில் அவர்கள் சோழவரம் படுத்த அலமாதி பகுதியை சேர்ந்த வினோத் மற்றும் விஜய் என்பது தெரிய வந்துள்ளது.

போலீசார் அவர்களை கைது செய்தது மட்டுமில்லாமல் அவர்கள் கடத்தலுக்காக பயன்படுத்திய ஆட்டோ,செல்போன் உள்ளிட்டவற்றை பறிமுதல் செய்து இது தொடர்பாக மேலும் விசாரணை நடத்தி வருவதாக கூறப்படுகிறது.