இந்தியா முழுவதும் உள்ள 6 மாநிலங்களில் 7 சட்டமன்றத் தொகுதிகளுக்கான இடைத்தேர்தல் கடந்த 3ம் தேதி நடைபெற்றது. இடைத்தேர்தலில் பதிவான வாக்கு எண்ணிக்கை இன்று காலை 9 மணிக்கு தொடங்கி நடைபெற்று வருகிறது. குறிப்பாக மகாராஷ்டிரா மாநிலத்தில் கிழக்கு அந்தேரி தொகுதி, பீகார் மாநிலத்தில் மோகாம் மற்றும் கோபால்காஞ்ஜி ஆகிய இரு தொகுதிகள், ஹரியானா மாநிலத்தில் அடம்பூர் தொகுதி, தெலுங்கானா மாநிலத்தில் முனுகோட் தொகுதி, உத்தரப்பிரதேச மாநிலத்தில் கோலோ கோக்ரன்நாத் தொகுதி, ஒடிசா மாநிலத்தில் தாம்நகர் தனித்தொகுதி என ஏழு தொகுதிகளுக்கான வாக்கு எண்ணிக்கை நடைபெற்று வருகிறது.

இந்த வாக்கு எண்ணிக்கையின் காலை 10 மணி நிலவரப்படி, பீகார் மாநிலத்தின் கோபால்காஞ்சி தொகுதியில் ஆளும் ஆர்.ஜே.டி கட்சியை சேர்ந்த மோகன் பிரசாத் குப்தா 915 வாக்குகள் முன்னிலை பெற்றுள்ளார். அதேபோல் மோகாம் தொகுதியில் ஆர்.ஜே.டி வேட்பாளர் நீலம்தேவி 7,724 வாக்குகள் முன்னிலை பெற்றுள்ளார். 

ஹரியானா மாநிலம் அடம்பூர் தொகுதிக்கான இடைத்தேர்தலில் பாஜகவை சேர்ந்த பவ்யா போஷினி 1,978 வாக்குகள் முன்னிலை பெற்றுள்ளார். மகாராஷ்டிரா மாநில கிழக்கு அந்தேரி தொகுதியில் உத்தவ் தாக்ரே அணியைச் சேர்ந்த ருதுஜா ரமேஷ் 10,929 வாக்குகள் வித்தியாசத்தில் முன்னிலையில் உள்ளார். ஒரிசா மாநிலம் தாம்நகர் தொகுதியில் பாஜகவைச் சேர்ந்த சூரியபஞ்ஷி சுராஜ் 1379 வாக்குகள் வித்தியாசத்தில் முன்னிலை பெற்றுள்ளார். 

தெலுங்கானா மாநிலத்தின் சர்ச்சைக்குரிய தொகுதியான முனுகோடில் ஆளும் டி.எஸ்.ஆர் கட்சியைச் சார்ந்த பிரபாகர் ரெட்டி 1,292 வாக்குகள் வித்தியாசத்தில் முன்னிலையில் உள்ளார். பாஜக ஆளும் உத்தரபிரதேச மாநிலத்தில் நடைபெற்ற கோல் கோக்ரநாத் தொகுதியில் பாஜக வேட்பாளர் அமன்கிரி 12,137 வாக்குகள் வித்தியாசத்தில் முன்னிலை பெற்றுள்ளார்.

இன்று காலை 10 மணி நிலவரப்படி 7 தொகுதிகளுக்கான இடைத்தேர்தலில் 3 தொகுதிகளில் மட்டுமே பாஜக முன்னிலையில் இருந்து வருகிறது. மகாராஷ்டிர மாநில கிழக்கு அந்தேரி தொகுதியில் பாஜக சார்பில் யாரும் போட்டியிடவில்லை. பீகாரிலும் தெலுங்கானாவிலும் பாஜக இரண்டாம் இடத்தை பிடித்து வருகிறது. வாக்குகள் எண்ணப்பட்டு இன்று மாலை முடிவுகள் அறிவிக்கப்படும் என எதிர்பார்க்கப்படுகிறது.