ஏழாவது மாடியில் இருந்து அறுந்து விழுந்த லிப்ட்; 8 பேர் உயிரிழப்பு - பிரதமர் மோடி இரங்கல்!

குஜராத் மாநிலத்தில் உள்ள அகமதாபாத்தில் குஜராத் பல்கலைக்கழகத்திற்கு அருகில் கட்டுமானப் பணிகள் நடைபெற்று வந்த கட்டிடம் ஒன்றிலிருந்து லிப்ட் அறுந்து விழுந்து விபத்துக்குள்ளானது.

ஏழாவது மாடியிலிருந்து லிப்ட் அறுந்து விழுந்ததால் ஏற்பட்ட விபத்தில் எட்டு பேர் உயிரிழந்தனர். இதில் காயமடைந்த ஒருவர் மருத்துவமனைக்கு கொண்டு செல்லப்பட்டார். இந்நிலையில், லிப்ட் அறுந்து விழுந்து 8 பேர் உயிரிழந்ததற்கு பிரதமர் நரேந்திர மோடி இரங்கல் தெரிவித்துள்ளார்.

இதுகுறித்து, பிரதமர் அலுவலகம் வெளியிட்டுள்ள டுவிட்டர் பதிவில், " அகமதாபாத்தில் கட்டப்பட்டு வரும் கட்டிடத்தில் நடந்த விபத்து வருத்தமளிக்கிறது. இந்த விபத்தில் தங்கள் குடும்ப உறுப்பினர்களை இழந்தவர்களுக்கு ஆழ்ந்த இரங்கலை தெரிவித்துக் கொள்கிறேன். காயமடைந்தவர்கள் விரைவில் குணமடைவார்கள் என நம்புகிறேன். பாதிக்கப்பட்ட மக்களுக்கு உள்ளுர் அதிகாரிகள் அனைத்து உதவிகளையும் செய்து வருகின்றனர்." என்று தெரிவித்துள்ளார்கள்.